"சனநாயகம் பரவி வரும் வேளையில் உலகில் தனிநாயமும் விளங்கத்தான் செய்கிறது. தமிழக மண்ணிலே தமிழ் காக்கப் போராடும் நிலையிருக்க, உலகெங்கும் சென்று கன்னித் தமிழின் மென்மையை, இனிமையை - மணத்தைப் பரப்புவதில் உலகிலே ஒரு தனிநாயகம் தோன்றித்தான் உள்ளது. அந்தத் தனிநாயகம் யார் என்றால் இங்கு வீற்றிருந்து தமிழே உயிரென்றும், தமிழ்ப் பணியே வாழ்வென்றும் கருதித் திகழ்ந்துவரும் அடிகளாரேயாவார்.
"அவர் எங்கெங்கு சென்றிடினும் தமிழுக்கென்றே ஒரு தனிநாயத்தை ஏற்படுத்தி வருகிறார். பெயருக்கேற்ற ஆட்சி, என்னே அவரது பெயர்ப் பொருத்தம்!

- மலேயப் பல்கலைக் கழகத்தில் அண்ணா

"அண்ணாவின் இதயத்திலிருந்து வரும் தமிழின் இனிமை கண்டு அண்ணாவின் மாணவனாக ஆகும் பேறு எனக்குக் கிட்டவில்லை என வருந்துகிறேன்"

- நன்றிவுரையில் தனிநாயகம் அடிகள்.

"கடலுக்குள்ள வலிமை ஒரு துளி தண்ணீருக்கு இல்லையே ஏன்?" என்று கௌதம புத்தரிடத்தில் ஒரு நாள் அவருடைய சீடர் ஒருவர் கேட்டார்.
" அதற்குப் புத்தர் பதிலளிக்கையில், அந்த துளித் தண்ணீர் கடலுடன் கலந்துவிட்டால், கடலின் வலிவு அத்தனையும் அந்த ஒரு துளித் தண்ணீருக்குக் கிடைத்துவிடும்" என்றார்.
"அதுபோல, இந்நாட்டில் வாழும் பத்து இலட்சம் தமிழ் மக்களும் இந்நாட்டுடன் இரண்டறக் கலந்துவிட்டால் மலேசியா வலிவடைந்துவிடும்."

- ஜோகூர் ஸ்டேடியத்தில் அண்ணா பேச்சு

மலேசியச் சுற்றுப் பயணத்தில் இருந்த அறிஞர் அண்ணா அவர்கள், அப்போதைய கழகப் பொருளாளரான கலைஞர் அவர்களுக்கு மடல் ஒன்று எழுதியிருந்தார்.
அந்த மடலில், சிங்கப்பூரில் கடலோரத்தில் உள்ள எழில் மாளிகையான வங்கிக் கட்டிடம் அச்சிடப் பட்டிருந்தது.
அதுபற்றி அண்ணா அவர்கள் பின்வருமாறு குறிப்பிட்டுவிட்டுக் கடிதத்தைத் தொடங்கியிருந்தார்கள்.
"தம்பி!
"இங்குள்ள எழில் மாடங்களில் ஒன்று - படத்தில்தான் நானும் பார்க்கிறேன்; ஓயாத கூட்டம் அங்கு போலவே! ஒரு மாறுதலும் இல்லை.
மற்றவர்களுக்கு இது உல்லாச புரி; நமக்கு அல்ல!"

அன்புள்ள,
அண்ணாதுரை

அறிஞர் அண்ணா, அவர்கள் கம்போடியாவிலிருந்து பொருளாளர் கலைஞர் அவர்களுக்குக் கடிதமொன்று அனுப்பினார்கள். அது இது:

தம்பி,
நலம். கம்போடியாவிலிருந்து எழுதுகிறேன்; ஜப்பான் செல்லும் வழி. மாறன் மற்றும் குழந்தைகள் யாவரும் நலம் என்று நம்புகிறேன். எல்லோரையும் விசாரித்ததாகச் சொல்லவும்.

அன்பன்,
அண்ணாதுரை